🚨 धक्कादायक! बारामतीत ५ लाखांची लाच घेताना पोलीस हवालदार ACBच्या जाळ्यात

तक्रारदाराविरुद्ध कारवाई न करण्यासाठी ७ लाखांची मागणी; ५ लाख स्वीकारताना रंगेहाथ पकडल्याची माहिती

बारामती : तक्रारदार आणि त्यांच्या पत्नीविरुद्ध कारवाई न करण्यासाठी तब्बल ७ लाख रुपयांची लाच मागून त्यापैकी ५ लाख रुपये स्वीकारताना बारामती तालुका पोलीस ठाण्यातील पोलीस हवालदार महेश अंकुश उगले (वय ३६) यांना पुणे लाचलुचपत प्रतिबंधक विभागाच्या पथकाने ८ सप्टेंबर २०२६ रोजी रंगेहाथ पकडल्याची माहिती समोर आली आहे.

मिळालेल्या माहितीनुसार, तक्रारदाराच्या पत्नीचा बारामती परिसरात झुंबा डान्स क्लास व जिम असल्याचे सांगण्यात आले आहे. या क्लासमुळे त्रस्त झालेल्या नागरिकांनी क्लास व त्याच्या अनुषंगाने तक्रारदार आणि त्यांच्या पत्नीविरुद्ध पोलीस ठाण्यात तक्रार अर्ज करून कारवाईची मागणी केली होती.

या तक्रारीच्या चौकशीसाठी अर्ज महेश उगले यांच्याकडे आल्यानंतर, कारवाई न करण्यासाठी तक्रारदाराकडे ७ लाख रुपयांची लाच मागितल्याचा आरोप आहे. त्यानंतर तक्रारदाराने याबाबत पुणे लाचलुचपत प्रतिबंधक विभागाकडे तक्रार केली.

ACB पथकाने तक्रारीची पडताळणी केल्यानंतर सापळा रचला. या कारवाईदरम्यान आरोपी महेश उगले यांनी तक्रारदाराकडून ५ लाख रुपये स्वीकारल्याचे निष्पन्न झाल्यानंतर त्यांना रंगेहाथ पकडण्यात आले, अशी माहिती आहे.

ही कारवाई बारामती शहर पोलीस ठाण्याच्या हद्दीतील माळेगाव रोड परिसरातील पी.डी.सी.सी. बँकेजवळ करण्यात आल्याचे वृत्त आहे. आरोपीकडून उर्वरित २ लाख रुपयांची मागणी झाल्याचेही समोर आले आहे.

या प्रकरणी भ्रष्टाचार प्रतिबंधक अधिनियम १९८८ मधील कलम ७ अन्वये गुन्हा दाखल करण्याची प्रक्रिया सुरू असल्याची माहिती आहे. आरोपी महेश उगले यांना पुढील कारवाईसाठी ताब्यात घेण्यात आले आहे.

ही कारवाई पोलीस अधीक्षक शिरीष सरदेशपांडे, अपर पोलीस अधीक्षक अजित पाटील (लाचलुचपत प्रतिबंधक विभाग, पुणे) आणि पोलीस उपअधीक्षक सतीश वाळके यांच्या मार्गदर्शनाखाली करण्यात आल्याचे वृत्तात नमूद आहे. पोलीस निरीक्षक संतोष पाटील, पोलीस हवालदार प्रवीण तावरे, पोलीस कॉन्स्टेबल आशिष कदमकर आणि चालक पोलीस कॉन्स्टेबल चंद्रकांत कदम यांच्या पथकाने ही कारवाई केल्याची माहिती आहे.

❓ या प्रकरणात आणखी कोणाचा सहभाग आहे का?

५ लाखांची लाच स्वीकारताना पोलीस हवालदार ACBच्या जाळ्यात अडकल्यानंतर या प्रकरणामागे आणखी कोणाचा सहभाग आहे का, याबाबत बारामतीत चर्चेला उधाण आले आहे. ACBच्या पुढील तपासातून या प्रकरणातील संपूर्ण साखळी आणि वस्तुस्थिती स्पष्ट होणार आहे.

JANATECHA AWAJ

✍🏻मुख्य संपादक – मंगलदास तुकाराम निकाळजे 

मोबाईल नंबर – 8390041414