पोलिसांच्या कोम्बिंग ऑपरेशनवर नागरिकांचा सवाल; परिसरात दहशतीचे वातावरण निर्माण झाल्याचा आरोप
बारामती | प्रतिनिधी
बारामती शहरातील गुन्हेगारीला आळा घालण्यासाठी पोलिसांकडून कोम्बिंग ऑपरेशन, गुन्हेगारांचा शोध तसेच बेकायदेशीर शस्त्रांविरोधात कारवाई केली जात आहे. गुन्हेगारीविरोधातील पोलिसांच्या कारवाईला नागरिकांचा विरोध नाही. मात्र, प्रत्येक वेळी आमराई परिसरातच मोठ्या प्रमाणावर पोलीस कारवाई का केली जाते? असा सवाल आता नागरिकांकडून उपस्थित केला जात आहे.
अलीकडे आमराई परिसरात मोठ्या संख्येने पोलीस कर्मचारी दाखल झाल्याचे दृश्य समोर आले. या कारवाईमुळे परिसरातील सामान्य नागरिकांमध्ये दहशतीचे वातावरण निर्माण झाल्याची भावना व्यक्त केली जात आहे. विशेषतः महिला, विद्यार्थी, कष्टकरी आणि सर्वसामान्य कुटुंबांमध्ये मोठ्या पोलीस बंदोबस्तामुळे अस्वस्थता निर्माण होत असल्याचे स्थानिक नागरिकांचे म्हणणे आहे.
बारामती तालुक्याचे नवीन DYSP म्हणून श्री. चैतन्य कदम यांनी पदभार स्वीकारला आहे. त्यांनी यापूर्वी गडचिरोली येथे सेवा बजावल्याचे सांगितले जाते. मात्र, बारामतीतील आमराई परिसराकडे गडचिरोलीप्रमाणे पाहण्याची गरज आहे का? असा प्रश्नही नागरिकांकडून उपस्थित केला जात आहे.
बारामती शहरातील गुन्हेगारी केवळ आमराई परिसरापुरती मर्यादित आहे का? शहरातील इतर भागांमध्ये गुन्हेगारीच्या घटना घडत नाहीत का? जर संपूर्ण शहरात कायदा-सुव्यवस्था राखणे हे पोलिसांचे कर्तव्य असेल, तर कारवाई करताना शहरातील सर्व भागांसाठी समान निकष लागू केले जातात का, याबाबतही नागरिकांकडून प्रश्न उपस्थित केले जात आहेत.
काही व्यक्तींच्या गुन्हेगारीचा ठपका संपूर्ण परिसरावर का?
एखाद्या परिसरातील काही व्यक्तींवर गुन्हे दाखल असतील किंवा त्यांचे पूर्वीचे पोलीस अभिलेख असतील, तर त्यावरून संपूर्ण परिसराला गुन्हेगारीची ओळख देणे योग्य ठरेल का, हा महत्त्वाचा प्रश्न आहे.
आमराई परिसरातूनही अनेक नागरिक विविध क्षेत्रांत उल्लेखनीय कामगिरी करत आहेत. या परिसरातील युवक न्यायाधीश, डॉक्टर, पोलीस अधिकारी, वकील, पत्रकार, अभियंते, शिक्षक तसेच शासकीय सेवेत कार्यरत आहेत. त्यामुळे काही व्यक्तींवर गुन्हे दाखल असल्यास त्याचा ठपका संपूर्ण परिसरावर ठेवणे योग्य नसल्याचे नागरिकांचे म्हणणे आहे.
गुन्हेगारांविरोधात कारवाई करा; मात्र सामान्य नागरिकांना त्रास नको
कायद्याचे उल्लंघन करणाऱ्या व्यक्तींविरुद्ध पोलिसांनी कठोर कारवाई करणे आवश्यक आहे. बेकायदेशीर शस्त्रे, अमली पदार्थ किंवा इतर बेकायदेशीर प्रकार आढळल्यास कायद्यानुसार कारवाई झालीच पाहिजे.
मात्र, ही कारवाई पुराव्यावर, कायद्याच्या चौकटीत आणि कोणताही भेदभाव न करता झाली पाहिजे, अशी नागरिकांची अपेक्षा आहे. कारवाई करताना सामान्य नागरिक, महिला, विद्यार्थी आणि कष्टकरी कुटुंबांमध्ये अनावश्यक भीती किंवा अन्यायाची भावना निर्माण होणार नाही, याचीही काळजी घेणे गरजेचे आहे.
आमराई परिसरातील अवैध धंद्यांविरोधात कारवाई होते का?
बारामतीसह आमराई परिसरात मटका, जुगार, दारू, गुटखा, चक्री, गांजा तसेच इतर कथित अवैध धंदे सुरू असल्याची चर्चा नागरिकांमध्ये असल्याचे सांगितले जाते. या कथित अवैध धंद्यांविरोधात पोलिसांकडून सातत्याने आणि प्रभावी कारवाई केली जाते का, असा सवालही आता उपस्थित होत आहे.
गुन्हेगारीला खतपाणी घालणाऱ्या अवैध धंद्यांचा शोध घेणे आणि त्यांच्या मुळावर कारवाई करणे आवश्यक नाही का? असा प्रश्न नागरिकांकडून विचारला जात आहे. या अवैध धंद्यांना नेमके बळ कुठून मिळते, त्यामागे कोण आहेत आणि त्यांच्यावर कारवाई का होत नाही, याचाही तपास होणे गरजेचे असल्याचे नागरिकांचे म्हणणे आहे.
एकीकडे अवैध धंदे सुरू असल्याच्या तक्रारींकडे दुर्लक्ष होत असल्याची नागरिकांमध्ये भावना निर्माण व्हावी आणि दुसरीकडे त्यातून निर्माण होणाऱ्या गुन्हेगारीविरोधात कारवाई करण्यासाठी सामान्य नागरिकांच्या वस्त्यांमध्ये मोठ्या प्रमाणावर कोम्बिंग ऑपरेशन राबवले जावे, अशी परिस्थिती निर्माण होऊ नये, अशी अपेक्षा व्यक्त केली जात आहे.
अवैध धंद्यांवर प्रभावी कारवाई न करता केवळ गुन्हेगारांचा शोध घेण्यासाठी परिसरात मोठ्या प्रमाणावर पोलिसांची कारवाई केली जात असेल, तर त्यातून सामान्य नागरिकांमध्ये भीतीचे वातावरण निर्माण होण्याची शक्यता आहे, असा मुद्दाही उपस्थित केला जात आहे.
आमराईला गुन्हेगारीचा शिक्का नको
गुन्हेगार कोणत्याही परिसरातील असो, त्याच्यावर कायद्यानुसार कारवाई झाली पाहिजे. मात्र, एखाद्या विशिष्ट परिसरात वारंवार मोठ्या प्रमाणावर कोम्बिंग ऑपरेशन झाल्यास त्या परिसरातील प्रत्येक नागरिकाकडे संशयाच्या नजरेने पाहिले जात असल्याची भावना निर्माण होऊ शकते.
त्यामुळे पोलिसांनी कारवाईचे निकष स्पष्ट करावेत आणि बारामती शहरातील सर्व भागांमध्ये समान पद्धतीने कायदा-सुव्यवस्थेची अंमलबजावणी करावी, अशी मागणी नागरिकांकडून होत आहे.
आमराईला गुन्हेगारीचा शिक्का नको;
आमराईला समान कायदा, समान वागणूक आणि सन्मान हवा!
पोलिसांची कारवाई ही गुन्हेगारांविरोधात असावी; संपूर्ण परिसराविरोधात नव्हे, अशी भूमिका नागरिकांकडून व्यक्त केली जात आहे.
✍🏻मुख्य संपादक – मंगलदास तुकाराम निकाळजे
मोबाईल नंबर – 8390041414
