बारामती | प्रतिनिधी :
बारामती शहरातील एका नागरिकाच्या बँक खात्यातून तब्बल ₹3 लाख 90 हजार 23 रुपये 60 पैसे इतकी रक्कम त्याच्या परवानगीशिवाय वळती झाल्याची घटना समोर आली आहे. या प्रकरणी बारामती शहर पोलीस ठाण्यात FIR क्रमांक 0429/2026 नोंद करण्यात आला आहे.
पोलिसांनी दिलेल्या FIR नुसार, तक्रारदार मंगेश विठ्ठल खांडेकर यांनी दिलेल्या माहितीनुसार, त्यांचे बारामती येथील युको बँकेतील चालू खाते असून, त्यातून 1 ऑक्टोबर 2026 रोजी रात्री 11.22 वाजता अनधिकृत व्यवहार झाल्याचे त्यांच्या निदर्शनास आले.
तक्रारदारांच्या म्हणण्यानुसार, 3 ऑक्टोबर रोजी पत्नीच्या खरेदीसाठी पैसे पाठविताना फोन-पे व्यवहार फेल झाल्यानंतर त्यांनी बँक खात्याचा बॅलन्स तपासला. त्यावेळी खात्यातील रक्कम कमी झाल्याचे लक्षात आले. त्यानंतर मोबाईलवरील युको बँकेचे अॅप तपासले असता, 1 ऑक्टोबर रोजी खात्यातून ₹3,90,023.60 रुपये डेबिट झाल्याचे दिसून आले.
तक्रारदारांनी तत्काळ युको बँकेच्या बारामती शाखेत जाऊन व्यवस्थापकांकडून व्यवहाराची माहिती घेतली. बँकेकडून सदर व्यवहार फ्रॉड असल्याचे सांगण्यात आल्याचे तक्रारीत नमूद आहे. त्यानंतर 3 ऑक्टोबर रोजी सायबर हेल्पलाइन क्रमांक 1930 वर ऑनलाइन तक्रार करण्यात आली आहे.
या प्रकरणी तक्रारदाराने अज्ञात व्यक्तीने त्यांच्या परवानगीशिवाय बँक खात्यातून पैसे काढून फसवणूक केल्याचा आरोप केला आहे. पोलिसांनी माहिती तंत्रज्ञान अधिनियम 2000 मधील कलम 66(C), 66(D) तसेच भारतीय न्याय संहिता 2023 मधील कलम 318(4) अंतर्गत गुन्हा दाखल केला आहे.
FIR नुसार आरोपी सध्या अज्ञात असून, पोलिसांनी गुन्हा नोंदवून तपास सुरू केला आहे. प्रकरणाचा तपास बारामती शहर पोलिसांकडून करण्यात येत आहे.
सायबर फसवणुकीच्या वाढत्या घटनांच्या पार्श्वभूमीवर नागरिकांनी बँक खात्यातील व्यवहारांवर नियमित लक्ष ठेवणे, अनोळखी लिंक अथवा व्यक्तींना बँकिंग माहिती न देणे आणि संशयास्पद व्यवहार आढळल्यास तातडीने 1930 या सायबर हेल्पलाइनवर संपर्क साधणे महत्त्वाचे ठरते.
✍🏻मुख्य संपादक – मंगलदास तुकाराम निकाळजे
मोबाईल नंबर – 8390041414
