🚨 बारामतीत सोन्याच्या दागिन्यांची फसवणूक केल्याचा आरोप; माळेगाव पोलिसांत सराफाविरुद्ध गुन्हा दाखल

पावती देऊनही दागिने परत न केल्याची तक्रार; १७६ सोन्याचे मणी, नेकलेस व कानातील दागिने प्रकरणी तपास सुरू

माळेगाव : मौजे पानदरे येथील एका महिलेने सोन्याचे दागिने दुरुस्ती व बदलून देण्यासाठी सराफाकडे दिले होते. मात्र, वारंवार मागणी करूनही दागिने परत न दिल्याने फसवणूक झाल्याचा आरोप करत महिलेने माळेगाव पोलीस ठाण्यात तक्रार दाखल केली आहे. या तक्रारीवरून अमोल कचऱू पंडित यांच्याविरुद्ध गुन्हा दाखल करण्यात आला आहे.

पोलिसांकडे दाखल फिर्यादीनुसार, तक्रारदार महिलेची अमोल पंडित यांच्याशी पूर्वी सोन्याच्या व्यवहारातून ओळख झाली होती. २ जानेवारी २०२५ रोजी अमोल पंडित हे तक्रारदाराच्या घरी आले. त्यावेळी तिने आपल्या जवळील सोन्याचा नेकलेस मोडून त्यापासून मोहनमाळीसाठी मणी तयार करण्यास सांगितले. तसेच मोहनमाळेचे १७६ सोन्याचे मणी, गळ्यातील १ तोळा वजनाचा सोन्याचा नेकलेस आणि कानातील २ ग्रॅम २०० मिली वजनाच्या सोन्याच्या बुगड्या दुरुस्ती/बदलण्यासाठी दिल्याचे फिर्यादीत नमूद आहे.

यावेळी संबंधित सराफाने दागिन्यांचे वजन करून पावती दिली; मात्र पावतीवर शिक्का व सही नसल्याने तक्रारदाराने विचारणा केली असता काही दिवसांत दागिने परत देण्याचे आश्वासन देण्यात आल्याचे फिर्यादीत म्हटले आहे. त्यानंतर तक्रारदाराने फोन तसेच WhatsApp संदेशांद्वारे वारंवार दागिन्यांची मागणी केली. मात्र विविध कारणे सांगून दागिने परत देण्यास टाळाटाळ करण्यात आल्याचा आरोप आहे.

दरम्यान, मार्च २०२५ मध्ये संबंधित सराफाचे पानदरे येथील दुकान अचानक बंद झाल्याचे तक्रारदाराला समजल्याचे FIR मध्ये नमूद आहे. सुमारे दीड वर्ष दागिने परत मिळाले नसल्याने अखेर ३ सप्टेंबर २०२६ रोजी माळेगाव पोलीस ठाण्यात तक्रार दाखल करण्यात आली.

या प्रकरणी माळेगाव पोलीस ठाण्यात FIR क्रमांक 0225/2026 नोंद करण्यात आला असून भारतीय न्याय संहिता (BNS), 2023 मधील कलम 316(2) आणि 318(4) अन्वये गुन्हा दाखल करण्यात आला आहे. FIR नुसार प्रकरणाचा तपास पोलीस हवालदार महेश साहेबराव पाटरे यांच्याकडे सोपवण्यात आला आहे.

या प्रकरणातील आरोपांची सत्यता तपासादरम्यान स्पष्ट होणार असून,अजून किती लोकांचे दागिने घेऊन गेला आहे का याचा ही तपास होणार का याकडे लक्ष लागून आहे
पोलिसांकडून पुढील तपास सुरू आहे.

JANATECHA AWAJ

✍🏻मुख्य संपादक – मंगलदास तुकाराम निकाळजे 

मोबाईल नंबर – 8390041414