🚨 पुणे पोलिसांच्या कारवाईवर मानवी हक्क आयोगाचा दणका!

अल्पवयीन मुलांना पोलिसांच्या गाडीच्या बॉनेटला बांधून फिरवल्याचा आरोप; १५ हून अधिक पोलिसांविरोधात FIRची शिफारस

पुणे | प्रतिनिधी

पुणे शहरातील भारती विद्यापीठ पोलीस ठाण्याच्या हद्दीत काही अल्पवयीन मुलांना बेकायदेशीररीत्या ताब्यात ठेवणे, मारहाण करणे तसेच पोलिसांच्या वाहनाच्या बॉनेटला बांधून सार्वजनिक ठिकाणी फिरवल्याच्या गंभीर आरोपांची महाराष्ट्र राज्य मानवी हक्क आयोगाने दखल घेतली आहे.

या प्रकरणात आयोगाच्या पूर्ण खंडपीठाने पुणे पोलीस आयुक्तांसह १५ हून अधिक पोलीस अधिकारी व कर्मचाऱ्यांविरोधात FIR नोंदविण्याची शिफारस केली आहे. आयोगाने आपल्या तथ्यशोधन समितीचा अहवाल व त्यासोबतची कागदपत्रे FIR म्हणून ग्राह्य धरून पुढील तपास करण्याचे निर्देश महाराष्ट्राच्या पोलीस महासंचालकांना दिल्याचे वृत्त आहे.

तीन मुलांना बॉनेटला बांधून फिरवल्याचा आरोप

आयोगाच्या आदेशानुसार, तीन मुलांना दोरीने पोलिसांच्या वाहनाच्या बॉनेटला बांधून आंबेगाव पठार चौकीपासून भारती विद्यापीठ पोलीस ठाण्यापर्यंत सार्वजनिकरित्या फिरवण्यात आल्याचा आरोप आहे. या घटनेचे व्हिडिओ समोर आल्यानंतर प्रकरणाला गंभीर वळण मिळाले.

याशिवाय एकूण आठ अल्पवयीन मुलांना बेकायदेशीररीत्या ताब्यात ठेवणे, त्यांच्यावर क्रूरतेची वागणूक करणे आणि निर्धारित वेळेत त्यांना Juvenile Justice Board समोर हजर न केल्याचेही आयोगाच्या आदेशात नमूद असल्याचे वृत्त आहे.

तपास ADGP दर्जाच्या अधिकाऱ्याकडे

या प्रकरणातील आरोपांमध्ये पुणे पोलीस आयुक्तांचाही समावेश असल्याने, त्यांच्यापेक्षा कनिष्ठ अधिकाऱ्याकडे तपास न देता ADGP किंवा त्यापेक्षा वरिष्ठ दर्जाच्या अधिकाऱ्याकडे तपास सोपविण्याची दक्षता घेण्याचे निर्देश आयोगाने DGP यांना दिले आहेत.

मानवी हक्कांवर गंभीर प्रश्नचिन्ह!

कायद्याचे रक्षण करण्याची जबाबदारी असलेल्या पोलिसांकडूनच जर कोठडीतील व्यक्तींवर अमानुष वागणुकीचे आरोप होत असतील, तर हा केवळ एका घटनेचा प्रश्न नसून कायदा, मानवी प्रतिष्ठा आणि बाल न्यायव्यवस्थेच्या संरक्षणाचा गंभीर विषय असल्याची चर्चा सुरू झाली आहे.

महाराष्ट्र राज्य मानवी हक्क आयोगाने या प्रकरणाची दखल घेत कठोर भूमिका घेतल्याने आता FIR, स्वतंत्र तपास आणि दोषींवर पुढील कारवाई कधी होते? याकडे सर्वांचे लक्ष लागले आहे.

पुढील सुनावणी : २६ ऑक्टोबर २०२६

📌 जनतेचा आवाज | सत्यासाठी आवाज उठवणारे व्यासपीठ

JANATECHA AWAJ

✍🏻मुख्य संपादक – मंगलदास तुकाराम निकाळजे 

मोबाईल नंबर – 8390041414