🚨 बारामतीत दर महिन्याला ‘जनता दरबार’ भरविण्याची मागणी

अजितदादा असताना जनता दरबाराची मागणी का झाली नाही? आता नागरिकांना जनता दरबाराची गरज का भासतेय?

बारामती | प्रतिनिधी

बारामती तालुक्यातील नागरिकांच्या वैयक्तिक आणि सार्वजनिक समस्या थेट प्रशासनासमोर मांडता याव्यात आणि त्यांचे तातडीने निराकरण व्हावे, यासाठी दर महिन्याला एक दिवस ‘जनता दरबार’ आयोजित करण्यात यावा, अशी मागणी सामाजिक कार्यकर्ते संतोष कुंडलिक मायाडे व RTI सामाजिक कार्यकर्ते दादा आवाजी करे यांनी उपमुख्यमंत्री सुनेत्रा अजितदादा पवार यांच्याकडे निवेदनाद्वारे केली आहे.

मात्र या मागणीच्या निमित्ताने बारामतीच्या प्रशासन व्यवस्थेबाबत एक महत्त्वाचा प्रश्न उपस्थित झाला आहे. अजितदादा पवार हयात असताना त्यांच्या काळात बारामतीत दर महिन्याला जनता दरबार घ्यावा, अशी मागणी करण्याची वेळ नागरिकांवर आली नव्हती. त्यांच्या माध्यमातून नागरिकांच्या प्रश्नांकडे लक्ष दिले जात असल्याची भावना स्थानिक पातळीवर होती.

मात्र २८ जानेवारी २०२६ रोजी अजित पवार यांचे विमान दुर्घटनेत निधन झाल्यानंतर बारामतीच्या राजकीय व प्रशासकीय व्यवस्थेत मोठी पोकळी निर्माण झाली, अशी चर्चा आहे.

याच पार्श्वभूमीवर आता नागरिकांच्या समस्या सोडवण्यासाठी “जनता दरबार घ्या” अशी मागणी करण्याची वेळ का आली?, असा सवाल निवेदनकर्त्यांनी उपस्थित केला आहे.

निवेदनात नागरिकांच्या वैयक्तिक तसेच सार्वजनिक स्वरूपाच्या अनेक समस्या प्रशासनाच्या संबंधित पातळीवर वेळेत पोहोचत नसल्याचे नमूद करण्यात आले आहे. काही वेळा शासकीय अधिकारी-कर्मचाऱ्यांकडून नागरिकांच्या अडचणींचे समाधान होत नसल्याची तक्रारही करण्यात आली आहे.

अजितदादा पवार यांच्या काळात नागरिकांच्या प्रश्नांसाठी स्वतंत्रपणे जनता दरबाराची मागणी फारशी पुढे आली नाही; मात्र आज नागरिकांना आपले प्रश्न थेट अधिकाऱ्यांसमोर मांडण्यासाठी जनता दरबाराची मागणी करावी लागत आहे, हे प्रशासन आणि नागरिकांमधील संवादाच्या दृष्टीने विचार करण्यासारखे चित्र असल्याचे निवेदनकर्त्यांचे म्हणणे आहे.

प्रशासन आणि नागरिकांमध्ये थेट संवादाची मागणी

दर महिन्याला एक निश्चित तारीख ठरवून जनता दरबार आयोजित करण्यात यावा. या दरबारात ग्रामविकास, महसूल, पोलीस प्रशासन, पंचायत समिती, तहसील कार्यालय यांसह विविध विभागांचे संबंधित अधिकारी व कर्मचारी उपस्थित राहावेत, अशी मागणी करण्यात आली आहे.

नागरिकांनी आपल्या समस्या थेट संबंधित अधिकाऱ्यांसमोर मांडाव्यात आणि त्यावर शक्य तितक्या तातडीने कार्यवाही व्हावी, यासाठी जनता दरबार प्रभावीपणे राबविण्याची मागणी निवेदनात करण्यात आली आहे.

“जनतेला प्रशासनापर्यंत पोहोचण्यासाठी दरबाराची गरज का पडावी?”

“अजितदादा पवार असताना नागरिकांचे प्रश्न ऐकून घेण्यासाठी नेतृत्वाचा थेट संपर्क होता. आज त्यांच्या निधनानंतर नागरिकांना आपल्या समस्या प्रशासनापर्यंत पोहोचवण्यासाठी जनता दरबाराची मागणी करावी लागत असेल, तर ही केवळ मागणी नसून प्रशासनाने आत्मपरीक्षण करण्याची वेळ आहे,” अशी भूमिका निवेदनकर्त्यांनी मांडली आहे.

नियमित जनता दरबारामुळे प्रशासन आणि नागरिकांमधील संवाद वाढेल, नागरिकांचा प्रशासनावरील विश्वास दृढ होईल आणि प्रलंबित प्रश्नांच्या निराकरणाला गती मिळेल, असा विश्वासही निवेदनकर्त्यांनी व्यक्त केला आहे.

JANATECHA AWAJ

✍🏻मुख्य संपादक – मंगलदास तुकाराम निकाळजे 

मोबाईल नंबर – 8390041414