🚨 माळेगाव पोलिसांची दमदार कारवाई!

महिलेवर अत्याचार करून खून केल्याचा आरोप; अवघ्या दोन तासांत संशयित आरोपी जेरबंद, दागिने व पैंजण हस्तगत

माळेगाव | प्रतिनिधी

माळेगाव पोलीस ठाण्याच्या हद्दीत महिलेवर गंभीर अत्याचार करून तिचा खून केल्याच्या धक्कादायक प्रकरणाचा पोलिसांनी अवघ्या दोन तासांत छडा लावत संशयित आरोपीला जेरबंद केले आहे. या कारवाईत आरोपीकडून गुन्ह्यात वापरलेला हातोडा तसेच मृत महिलेच्या गळ्यातील सोन्याचे डोरले आणि पायातील पैंजण हस्तगत करण्यात आले आहेत.

पोलिसांनी दिलेल्या माहितीनुसार, माळेगाव पोलीस ठाणे गुन्हा रजि. क्र. २४६/२०२६, BNS कलम १०३(१) अन्वये १३ सप्टेंबर २०२६ रोजी रात्री २.५३ वाजता गुन्हा दाखल करण्यात आला. फिर्यादी रंजना लक्ष्मण पवार यांनी पोलिसांना दिलेल्या माहितीनुसार, त्यांचा मुलगा तानाजी लक्ष्मण पवार व त्याची पत्नी वैशाली तानाजी पवार हे पिंपळे एमआयडीसी परिसरात राहत होते.

१२ सप्टेंबर रोजी सायंकाळी सुमारे ७.४५ वाजता तानाजी याच्या शेजारील व्यक्तींनी त्याला मारहाण होत असल्याचे सांगितल्यानंतर फिर्यादी त्यांच्या घरी गेल्या. तेथे वैशाली पवार या घरातील खोलीत रक्ताच्या थारोळ्यात गंभीर अवस्थेत आढळून आल्या. त्यांच्यावर अज्ञात व्यक्तीने अज्ञात कारणातून हल्ला केल्याची माहिती पोलिसांना देण्यात आली.

घटनेची माहिती मिळताच माळेगाव पोलीस ठाण्याचे प्रभारी अधिकारी सहाय्यक पोलीस निरीक्षक कुलदीप संकपाल यांनी तातडीने घटनास्थळी धाव घेतली. पंचनामा करून जखमी महिलेला पुढील उपचारासाठी बारामती येथील मेडिकल कॉलेजमध्ये पाठवण्यात आले. घटनास्थळाची बारकाईने पाहणी करून तपास सुरू करण्यात आला.

तपासादरम्यान पोलिसांना गणेश रामचंद्र माने (वय २६, रा. पिंपळे, ता. बारामती, जि. पुणे) याच्याबाबत संशय निर्माण झाला. त्याला ताब्यात घेऊन कौशल्यपूर्ण चौकशी केली असता त्याने गुन्ह्याची कबुली दिल्याचे पोलिसांनी नमूद केले आहे. पोलिसांच्या माहितीनुसार, महिलेवर शारीरिक संबंधासाठी दबाव आणून हातोड्याने मारहाण केल्याचे तसेच त्यानंतर तिच्यावर जबरदस्ती केल्याचे त्याने सांगितले. महिलेने विरोध केल्यानंतर तिचा गळा आवळून खून केल्याचेही त्याने सांगितल्याचे प्रेस नोटमध्ये नमूद आहे.

तपासात आणखी धक्कादायक बाब समोर आली. आरोपीने महिलेच्या गळ्यातील सोन्याचे डोरले आणि पायातील पैंजण काढून नेल्याचे फिर्यादीने सांगितले होते. तसेच वैद्यकीय तपासणीत महिला गर्भवती असल्याचे आणि तिच्या डोक्यावर, मानेवर व इतर ठिकाणी गंभीर जखमा असल्याचे नमूद करण्यात आले आहे.

पोलिसांनी आरोपीला ताब्यात घेतले असून १६ सप्टेंबर २०२६ पर्यंत पोलीस कोठडी रिमांड देण्यात आल्याचे प्रेस नोटमध्ये नमूद आहे. गुन्ह्याच्या तपासादरम्यान योग्य ती कलमवाढ करण्यात आल्याचेही पोलिसांनी स्पष्ट केले आहे.

ही कारवाई पुणे ग्रामीण पोलीस अधीक्षक संदीपसिंह गिल, अपर पोलीस अधीक्षक गणेश बिरादार आणि उपविभागीय पोलीस अधिकारी चैतन्य कदम यांच्या मार्गदर्शनाखाली करण्यात आली. पुढील तपास सहायक पोलीस निरीक्षक कुलदीप संकपाल करीत आहेत.

🔴 पोलिसांच्या तपासामुळे अवघ्या काही तासांत गुन्ह्याचा छडा

गंभीर स्वरूपाच्या या घटनेनंतर माळेगाव पोलिसांनी घटनास्थळी तातडीने धाव घेत तपासाची चक्रे वेगाने फिरवली आणि संशयिताला ताब्यात घेतल्याने पोलिसांच्या तपासाची प्रशंसा होत आहे. मात्र, प्रकरणाचा पुढील तपास व न्यायालयीन प्रक्रिया पूर्ण झाल्यानंतरच आरोपांबाबत अंतिम निष्कर्ष स्पष्ट होणार आहे.

JANATECHA AWAJ

✍🏻मुख्य संपादक – मंगलदास तुकाराम निकाळजे 

मोबाईल नंबर – 8390041414