नवी दिल्ली:
उत्तर प्रदेशातील कानपूरमध्ये वंदे भारत ट्रेनवर दगडफेक करण्यात आली आहे. ही ट्रेन दिल्लीहून वाराणसीला जात होती. दगडफेकीमुळे वंदे भारत ट्रेनच्या डब्याच्या काचा फुटल्या. या घटनेनंतर प्रवाशांमध्ये घबराट पसरली होती. याप्रकरणी यूपी एटीएसने दोघांना अटक केली आहे. या भागात दगडफेकीची ही पहिली घटना नाही. दगडफेकीच्या अशा घटना यापूर्वीही समोर आल्या आहेत.
रेल्वेने दिलेल्या माहितीनुसार, कानपूरमधील पंकी रेल्वे स्टेशनजवळ वाराणसीहून दिल्लीला जाणाऱ्या वंदे भारत एक्स्प्रेस क्रमांक २२४३५ च्या एसी चेअरकार कोचवर दगडफेक करण्यात आली. वंदे भारत एक्स्प्रेसच्या २० डब्यांवर दगडफेक केल्याप्रकरणी अज्ञातांविरुद्ध गुन्हा दाखल करण्यात आला आहे. घटनेनंतर जीआरपी आणि आरपीएफच्या संयुक्त पथकांनी पंकी ते भाऊपूरपर्यंत गस्त घातली.
याप्रकरणी यूपी एटीएसने शाहिद आणि मोहम्मद हुसैन यांना अटक केली आहे. दोन्ही आरोपींनी अनेक वंदे भारत गाड्यांवर दगडफेक केली आहे. दोघांनी वंदे भारत एक्सप्रेस ट्रेनवर दगडफेक करून भीतीचे वातावरण पसरवले होते. दोघेही बिहारचे रहिवासी असल्याचे सांगण्यात येत आहे.
वंदे भारतच्या सी-७ कोचवर दगडफेक
रेल्वेकडून मिळालेल्या माहितीनुसार, वंदे भारत ट्रेन बुधवारी कानपूर सेंट्रल रेल्वे स्टेशनवरून नियोजित वेळेपेक्षा थोडी उशिराने निघाली. संध्याकाळी 7.05 वाजता ट्रेन पंकी स्टेशनच्या बाह्य सिग्नलवर दाखल होत असतानाच सी-7 कोचवर दगडफेक सुरू झाली. सी-7 कोचच्या काचेवर दगड आदळला. त्यामुळे काचा फुटून प्रवाशांमध्ये घबराट पसरली. अनेक प्रवासी त्यांच्या जागेवरून खाली वाकले.
वंदे भारत ट्रेनचा चालक आणि टीटीई यांनी याबाबत आरपीएफ पंकी यांना माहिती दिली, त्यानंतर आज आरपीएफने अज्ञात लोकांविरुद्ध रेल्वे मालमत्तेचे नुकसान करण्याच्या कलमाखाली गुन्हा दाखल केला.
वंदे भारतावर सातपेक्षा जास्त वेळा दगडफेक झाली
रेल्वेच्या म्हणण्यानुसार, कानपूरमधील या ठिकाणी गेल्या एक वर्षात वंदे भारत ट्रेनवर सातपेक्षा जास्त वेळा दगडफेक करण्यात आली आहे. दिल्ली मार्गावरील पंकी ते भाऊपूर स्थानकांदरम्यान आणि हावडा मार्गावरील चकेरी ते प्रेमपूर स्थानकांदरम्यान दगडफेकीच्या घटना घडतात. या ठिकाणी दगडफेक करणारे बहुतांश वंदे भारत एक्सप्रेसला लक्ष्य करतात.
✍🏻मुख्य संपादक – मंगलदास तुकाराम निकाळजे
मोबाईल नंबर – 8390041414
