आस्करवाडीतील ‘माउंटन मिस्ट’ हॉटेलमध्ये अवैध हुक्का बार सुरू असल्याचा आरोप; ₹61,950 किमतीचा मुद्देमाल जप्त
सासवड | प्रतिनिधी
आस्करवाडी, ता. पुरंदर परिसरातील हॉटेलमध्ये अवैधरीत्या हुक्का पार्लर सुरू असल्याबाबत मंगलदास निकाळजे यांनी केलेल्या निवेदनाची दखल घेत पोलिसांनी कारवाई केल्याचे समोर आले आहे. सासवड पोलिसांनी ‘माउंटन मिस्ट’ हॉटेलवर छापा टाकून हुक्का सेवन व विक्रीसाठी वापरण्यात येणारा साहित्यसाठा जप्त केला असून, याप्रकरणी तीन जणांविरुद्ध गुन्हा दाखल करण्यात आला आहे.
सासवड पोलीस ठाण्यात FIR क्रमांक 0462/2026 अन्वये दिनांक 21 सप्टेंबर 2026 रोजी पहाटे 4.53 वाजता गुन्ह्याची नोंद करण्यात आली. गुन्हा सिगारेट व इतर तंबाखूजन्य उत्पादने (जाहिरातीस प्रतिबंध व व्यापार व वाणिज्य व्यवहार आणि उत्पादन, पुरवठा व वितरण यांचे विनियमन) अधिनियम, 2003 मधील कलम 4A व 21A अंतर्गत दाखल करण्यात आला आहे.
पोलिसांच्या FIRनुसार, आस्करवाडी येथील ‘माउंटन मिस्ट’ हॉटेलमध्ये अवैधरीत्या हुक्का पार्लर सुरू असल्याची माहिती मिळाल्यानंतर पोलिसांनी पंचांच्या उपस्थितीत छापा टाकला. कारवाईदरम्यान हॉटेलमध्ये काही व्यक्ती हुक्का सेवन करताना आढळल्याचे FIRमध्ये नमूद आहे.
या कारवाईत 9 हुक्का पॉट, तंबाखूजन्य पदार्थांचे 10 डबे, 1 चिलीम आणि हुक्का ओढण्यासाठी वापरण्यात येणारे 6 रबरी पाइप असा एकूण ₹61,950 किमतीचा मुद्देमाल जप्त करण्यात आला.
FIRमध्ये विनोद प्रल्हाद सुद्रिक, आमिन कंगाल चौधरी आणि निषराज गणेशराज देपगोटा यांची आरोपी म्हणून नोंद आहे. पोलिसांच्या नोंदीनुसार हॉटेलचा व्यवस्थापक आणि मालकाबाबतही तपशील नमूद करण्यात आला आहे.
पोलिसांनी जप्त केलेल्या मुद्देमालाचा पंचनामा करून पुढील तपासासाठी कारवाई सुरू केली आहे. या प्रकरणाचा तपास पोलीस हवालदार आदिनाथ हरिभाऊ होळकर यांच्याकडे सोपविण्यात आला आहे.
“निवेदनाची दखल घेऊन कारवाई; अवैध हुक्का पार्लरवर पोलिसांचा बडगा”
अवैध हुक्का विक्री व सेवनाविरोधात सामाजिक कार्यकर्ते मंगलदास निकाळजे केलेल्या तक्रारीची प्रशासनाने गांभीर्याने दखल घेऊन कायदेशीर कारवाई करावी, अशी मागणी यापूर्वी करण्यात आली होती. त्यानंतर झालेल्या या पोलिस कारवाईमुळे संबंधित परिसरातील अवैध हुक्का व्यवसायावर प्रशासनाचे लक्ष वेधले गेले आहे.
✍🏻मुख्य संपादक – मंगलदास तुकाराम निकाळजे
मोबाईल नंबर – 8390041414
