बारामती, दि. 04 सप्टेंबर 2026 :
बारामती शहर पोलीस स्टेशन हद्दीतील भिगवण रोड परिसरातील एका निवासी इमारतीत राहणाऱ्या १६ वर्षीय विद्यार्थिनीने इमारतीच्या चौथ्या मजल्यावरील टेरेसवरून खाली उडी मारून आत्महत्या केल्याची दुर्घटनी घटना आज पहाटे घडली. ती बारामती येथील एका महाविद्यालयात इयत्ता अकरावी सायन्समध्ये शिकत होती. सध्या तिच्या परीक्षा सुरू असून, अभ्यास व परीक्षेच्या सततच्या ताणामुळे तिने हे टोकाचे पाऊल उचलल्याची प्राथमिक माहिती पालकांनी दिली आहे.
नेमकं काय घडलं?
पोलिसांनी दिलेल्या माहितीनुसार, मृत विद्यार्थिनी आज पहाटे साडेबारा वाजेपर्यंत अभ्यास करत होती. त्यानंतर टेरेसवर जाऊन येत असल्याचे सांगून ती इमारतीच्या चौथ्या मजल्यावरील गच्चीवर गेली. बराच वेळ ती खाली न आल्याने तिचे वडील तिला शोधण्यासाठी वर गेले. त्यावेळी ती टेरेसच्या कड्यावर खाली पाय सोडून बसलेली आढळली. वडिलांनी तिला आवाज देऊन विचारणा केली असता, तिने त्यांच्याकडे पाहून अचानक खाली उडी मारली.
या घटनेत ती गंभीर जखमी झाली. आई-वडील व शेजाऱ्यांच्या मदतीने तिला तातडीने बारामती येथील वैद्यकीय महाविद्यालयात दाखल करण्यात आले. उपचारादरम्यान काही वेळ ती शुद्धीवर आली होती आणि तिने आईकडे पाणी मागितले होते. मात्र, प्रकृती अधिक खालावल्याने उपचारादरम्यान तिचा मृत्यू झाला.
पोलिसांची सखोल चौकशी सुरू
सदर प्रकरणी मृत विद्यार्थिनीच्या पालकांनी वा नातेवाईकांनी अद्याप कोणावरही संशय व्यक्त केलेला नाही किंवा तक्रार नोंदवलेली नाही. मृत विद्यार्थिनीकडे स्वतःचा मोबाईल फोन नव्हता, ती आई-वडिलांच्या फोनचा वापर करत होती. त्या अनुषंगाने डिजिटल माहितीची पडताळणी करण्यात येत आहे. तसेच यापूर्वी ती घरातून निघून गेल्याची नोंद बारामती शहर पोलीस ठाण्यात होती, त्या कागदपत्रांची व जबाबांचीही पडताळणी सुरू आहे.
घटनास्थळाची पाहणी, पंचनामे, सीसीटीव्ही फुटेज, वैद्यकीय अहवाल तसेच पालक, शिक्षक आणि मैत्रिणींचे जबाब नोंदवून बारामती शहर पोलिसांकडून घटनेची सर्व बाजूंनी सखोल चौकशी केली जात असून सध्या अकस्मात मृत्यूची नोंद करण्यात आली आहे.
महत्त्वाचे आवाहन:
मृत विद्यार्थिनी अल्पवयीन असल्याने तिची ओळख गोपनीय ठेवण्यात आली आहे. नागरिक व प्रसारमाध्यमांनी तिचे नाव, छायाचित्र किंवा ओळख पटेल अशी कोणतीही वैयक्तिक माहिती प्रसिद्ध करू नये, असे आवाहन बारामती शहर पोलीस स्टेशनचे प्रभारी पोलीस निरीक्षक यांनी केले आहे.
✍🏻मुख्य संपादक – मंगलदास तुकाराम निकाळजे
मोबाईल नंबर – 8390041414
